മിസിസ് കാനഡ എർത്ത് പട്ടം നേടിയ കണ്ണൂരുകാരി

കണ്ണൂർ:യോഗയുടെ ശക്തി പുതിയ തലമുറയ്ക്ക് പകർന്ന് കൊടുക്കണമെന്നും അതിന് വലിയ മാറ്റം ഉണ്ടാക്കാനാകുമെന്നും മിസിസ് കാനഡ എർത്ത് പട്ടം നേടിയ കണ്ണൂരുകാരി മിലി ഭാസ്കർ.

കാനഡയിലെ 39 ശതമാനം യുവതയും മാനസികപിരിമുറുക്കം കാരണം ബുദ്ധിമുട്ടുകയാണ്. 12-നും 19-നും ഇടയില്‍ പ്രായമുള്ളവരില്‍ ആത്മഹത്യാപ്രവണത കൂടുന്നു. യാഥാർഥ്യങ്ങളോട് പൊരുത്തപ്പെടാനാകാത്തതും സാമൂഹികമാധ്യമങ്ങളുടെ അതിപ്രസരവുമാണ് ഇതിന് പിന്നിലെന്നും യോഗ പരിശീലനം വഴി ഒരു പരിധിവരെ പുതിയ തലമുറയെ നേർവഴിക്ക് നടത്താനാകുമെന്നും രണ്ട് കുട്ടികളുടെ അമ്മയായ മിലി അഭിപ്രായപ്പെടുന്നു.

ജൂലായ് അവസാനം നടന്ന മത്സരത്തിലാണ് മിലി കിരീടം നേടിയത്. ഈ നേട്ടം കൈവരിക്കുന്ന ആദ്യ ഇന്ത്യക്കാരിയാണ് മിലി. കണ്ണൂർ പഴയ ബസ് സ്റ്റാൻഡിന് സമീപത്തെ ‘മാധവം’ വീട്ടില്‍ ടി.സി. ഭാസ്കരന്റെയും ജയയുടെയും ഏക മകളാണ്. ബാങ്ക് ഓഫ് ഇന്ത്യ മുൻ ചീഫ് മാനേജരാണ് ഭാസ്കരൻ. ജയ കണ്ണൂർ ജില്ലാ ബാങ്ക് മുൻ ജനറല്‍ മാനേജരും.

കാസർകോട് എല്‍.ബി.എസ്. എൻജിനിയറിങ് കോളേജില്‍നിന്ന് ഇലക്‌ട്രോണിക്സില്‍ ബിരുദവും ബെംഗളൂരു ജെയിൻ ഇൻസ്റ്റിറ്റ്യൂട്ടില്‍നിന്ന് ഫിനാൻസ് ആൻഡ് മാർക്കറ്റിങ്ങില്‍ മാനേജ്മെന്റ് ബിരുദവും ഋഷികേശില്‍നിന്ന് യോഗാധ്യാപക കോഴ്സും പൂർത്തിയാക്കിയിട്ടുണ്ട് മിലി. 2024 ജനുവരിയില്‍ നടന്ന മിസിസ് മലയാളി കാനഡ മത്സരമാണ് സൗന്ദര്യമത്സരത്തിലേക്ക് വഴിതിരിച്ചുവിട്ടത്. മത്സരത്തിന് യോഗ്യത നേടിയ 52 പേരില്‍ കൊച്ചിയില്‍ നിന്നുള്ള ജനനി, തൃശ്ശൂരിലെ കിത്തു, കോഴിക്കോട്ടെ ചിത്ര എന്നീ മലയാളികളും ഉണ്ടായിരുന്നു. മിസിസ് കാനഡ എർത്തായി തിരഞ്ഞെടുക്കപ്പെട്ടതോടെ മിസിസ് എർത്ത് ഗ്ലോബല്‍ മത്സരത്തില്‍ പങ്കെടുക്കാനുള്ള തയ്യാറെടുപ്പിലാണ്.

കണ്ണൂർ സെയ്ന്റ് തെരേസാസിലും ചിന്മയ വിദ്യാലയത്തിലും പഠിക്കുന്ന കാലത്ത് കൂട്ടുകാരികള്‍ക്കൊപ്പം തിരുവാതിര കളിച്ചതൊഴിച്ചാല്‍ കലയുമായി മിലിക്ക് മറ്റു ബന്ധങ്ങളൊന്നുമില്ല. പഠനത്തിലായിരുന്നു മകളുടെ മുഴുവൻ ശ്രദ്ധയുമെന്ന് ഭാസ്കരനും ജയയും പറയുന്നു. ഇൻഫോസിസില്‍ ജോലി ചെയ്യുന്നതിനിടെയാണ് ഡല്‍ഹി മലയാളിയായ മഹേഷ് കുമാറുമായുള്ള മിലിയുടെ വിവാഹം. അതിന് ശേഷം അസെന്ററില്‍ ജോലി ചെയ്യുന്നതിനിടെയാണ് കാനഡയിലെ പ്രശസ്തമായ ഡെലോയിറ്റ് എന്ന ഓഡിറ്റ് കമ്ബനിയില്‍ മാനേജറായി ചേർന്നത്. ഒൻപത് വർഷമായി കാനഡയില്‍ തുടരുന്ന മിലി ഇപ്പോള്‍ കമ്ബനിയുടെ ഡയറക്ടർമാരിലൊരാളാണ്. കാനഡയില്‍ വിദ്യാർഥികളായ തമന്ന, അർമാൻ എന്നിവർ മക്കള്‍.

STORY HIGHLIGHTS:A Kannur girl who won the title of Mrs. Canada Earth